［太古之達人］PP3十三年加四倍租，股價呢？
Facebook 專頁有更多無聊短文: https://www.facebook.com/ivanliresearch/
原來太古廣場寫字樓舊年加租26%， Wow。太古三期加到近百三蚊尺租。但，而家先百三蚊？我記得好似我走嘅年代（2014）都成舊水啦喎？定舊年加幅主要係一二期？定分期咁加三年五年一次咁？
（經濟日報有詳細講，又係朋友嘅文，嗯，我好多朋友的）
應該睇我一系列嘅文都見我提起太古廣場三期。因為真係多可喜，亦多可悲。耆英證券當年嘅寫字樓。暫時仲係我做得最長嘅一份工，八年，eight fucking years，真係女都換咗幾條（尤幸：我同囡囡一齊超過八年，hurrah !）．最開心嘅日子在嗰度，最恥辱嘅日子都在嗰度（唯一一次畀人炒嘛。拿，搞清楚，星展我唔係畀人炒或迫我走的）。我一生中最好精力嘅日子都奉獻咗嗰度。
回想當年入職見占士咖啡時，係2006年3月定4月。有趣係當時耆英仲未搬去太古三，仲在美利堅銀行中心。亦即係我見工時在佢地舊寫字樓，返工就去咗新寫字樓。亦即係我返嗰時個寫字樓係全新嘅，幾咁爽。更過癮係，蕉行都係在美利堅銀行中心（而家仲係，至少我早兩年去都仲在） — 就在耆英舊寫字樓樓上。所以當年見占士咖啡，我係就咁行落梯落去的。
講返，當初太古三嗰個位其實有啲隔涉（大佬，叔叔返工嘅年代邊會話做Research返小西灣返觀塘咁痴線）。嗰個區，而家你叫星街，或者叫太古廣場三期。但最初我地坐的士，的士司機未熟，而大家都知點叫；大佛口。講大佛口司機就明，至少四十歲以上嘅實明。
當其時係冇嗰條地底通道通去地鐵站的，甚至天橋駁去軍器廠街都係後來先開。但我入職冇耐就有通道通去地鐵站，而其實係太古自己比錢的（唔通地鐵比咩）。但除笨有精啦，一來吸咗你啲員工過返去太古一二期食飯（雖然我好少，灣仔大把好嘢食），二來三期租金又可以貴啲，三來太古本身嗰頭都一堆舊樓又升埋值，點會死錯人？原理同新鴻基起大欖隧度差不多，有基建啲樓盤咪方便咗，咪元朗都可以賣貴啲。
想當年，太古三開幕（2005）好似三十蚊尺，到我入耆英時（2006）好似四十蚊尺租，而我地又唔係咩anchor tenant（得嗰一層），照計冇特別優惠。而家呢？百三蚊。真係和味。但因為租客係仆街萬惡大企業，唔會有人話太古「瘋狂加租」，或者「趕絶乜乜」。不過你睇返啲出租率基本上係100%，根本就供不應求。
太古（19）股價呢？其實升得少，七十蚊升到而先九十蚊（計年頭先係七十咋，計我入職八十添），計埋派息都好，都係幾跑輸。人人話冇料到嘅恒生指數，萬五六點，升到而家兩萬八，派息仲肯定好過太古。
因乜？其中一個原因，就真係因…..因航。國泰嘅股價，當年十三四蚊，而家十二，息有派過下但唔多。基本上原地踏步。但你話因航垃圾？挑，SQ當年十三四蚊，而家十蚊都冇。根本做航空公司就係咁。
大贏家？聰明嘅你可能睇我講太古股價已估到，就係太古地產（1972）。太古2012年拆咗隻太古地產出嚟嘛，所以呢隻先係大贏家。你睇太古地產，2012年頭先17蚊，而家30蚊。
無論如何，又係字幕交代發展嘅時間。我在耆英撈咗8年，2006玩到2014，始終在太古三期30樓，女換咗幾條，婚都結埋，樓買咗，職升過，部門調過，坐位都換過兩次（8年轉兩次位唔多啦下話，仲要掉過部門）。
耆英後來都搬走，因為實在太貴租，早兩年搬咗去利園三期，即係希慎道，新寧大廈。亦即係 《英雄本色》 大哥成行出嚟Mark哥（已跛）執錢嗰度，又即係 《天涯海角》 陳慧琳 返工嗰度（Btw，入面講佢係船公司太子女，嗰個寫字樓正係 馬士基船務，因為我上過去見工，朋友亦在嗰度返工）
想知我在耆英或太古三嘅前事，呢度係舊文：
Facebook 專頁有更多無聊短文: https://www.facebook.com/ivanliresearch/
