［點解轉咗行］安雅會談（1/4）—千其唔好搞同事
前言（睇過嘅可飛）：
呢個系列，講嘅係我點解好地地，由教中學拎兩萬蚊人工，裸辭（而家我先醒起）去做銀行，拎萬二蚊人工。未必係我一生中最大嘅決定（結婚，買樓，或者廿蚊冇買騰訊應該大啲），但算係一個好多人問嘅決定。因為我的確教書係好地地，學生愛戴，老校又睇我，忽然自減人工，點解？個問題我答過冇一千都幾百次，開頭幾年見工必問，識親新朋友知我以前教書又會問。
又或者飛機下，假設我地呢個年代冇網上，我又成咗名，我死後大家驗屍，小朋友讀作者生平，一定會問呢個問題：點解呢條友唔教書去咗做銀行。正如你會問點解魯迅棄醫從文。反而你唔會問點解我結婚點解我買樓，呢啲可能重要，但唔難解。
一切，其實就由安雅講起。就係2003年嘅一次宵夜（梗係唔係同安雅食啦）講起。呢個決定真係幾重要，所以寫夠四篇，平安夜同你玩到年初四（27號你返工咪年初四咯），一日一篇。去片。
Facebook 專頁有更多短文: https://www.facebook.com/ivanliresearch
1.之前寫辭職記第一部，用過呢張相。我老婆遠遠望到張相，已經知道係安雅。雖則傳說中嘅「安雅會談」時，佢仲讀緊書，但佢有聽過呢個故事。篇文收視未如理想（我對自己有期望的），但欲罷不能。寫開繼續寫。亦都應該面對下自己。事隔15年，先好似第一次唔正經地正經寫低。
2. 一百萬（YEN？）問題就係：點解2004年，我唔教書（裸辭的！），走去做銀行。呢個問題畀人問過無數次。朋友會問，女會問，見工又會問。我當然答過好多次，但好似冇好老實咁答過。我記得見工第一次問，係在荷蘭銀行（唔係西門吹雪，荷蘭銀行好多UNIT），全英文（唔通荷文？）嘅面試，後來好平常（全蝗語都成日有，雖然我懷疑佢聽唔聽得明我講乜），但當年已唔多慣。但總冇可能話畀荷蘭佬聽：It’ｓ because of 安雅。No No No, Not the Irish Singer, I mean Anya Wu! Do you know Young and Dangerous VI ？Oh Young and Dangerous III was filmed in Amsterdam you know ? Featuring Ajax, your bank sponsored them.
（曼德拉效應冷知識：古惑仔六勝者為王英文並冇 Young and Dangerous，中文戲名甚至冇古惑仔三隻字，成個系列reboot前唯一一套）
3. 呢個係一個相當大嘅決定。仲係一個其實好多人都唔知點解，甚至我都唔係好知點解嘅決定。其他大事，例如買樓呀結婚呀，甚至係點解當時買點解買屯門點解娶呢個老婆（係咯，點解唔買貝沙灣？點解唔娶李佳芯？你話呢），都易解。
4. 但點解教教下書走咗去做銀行，就有點費解
5. 而由 2萬蚊變到萬綺雯，就更加加大咗個難度。其實唔難？你試下take 四成丕咳，自己主動喎，唔係人地減你。提下你，減咗四成人工，唔係要加返四成，係要加返七成，更唔好計中途通脹。再提埋你，我在九龍教書，唔使過海，學校又畀出去食飯（對，老師都唔畀！在教室看監犯），咁學校啲飯又平（仲可以拎學生嘅嚟食，總有幾件幽靈長期唔出現，或者十日病咗九日，或者訂咗飯唔食）。實在唔使幾多錢。去到返中環做Central Wanker，人工少四成開支升唔少，生活當然大圍痛苦，大埔都痛苦。而呢啲都係事前可預計嘅。
6. 咁做乜仲要走？同好多人以為唔同，其實我教書教得相當開心，幸運地班學生比較易搞（有人搞埋上床添，但唔係我），係呀，孔子都唔教Band 5學生。有人教，但唔係我。你見啲學生而家仲搵我食飯，仲睇我啲文，我結婚都搵學生證婚，就知同學生相當好啦（都話有人更好，上埋床，但唔係我）
7. 家長？嗰個年代啲家長冇咁撚煩的，況且本人都話學霸，拎會考高考證書出嚟啲家長必然收聲，伊時過伊斯高。同事？都幾好架。就係衰在太好。我企圖搞同事咯。追求不遂啫，之後講。
8. 遠因，其實可能係話個老校變態。咁但係，佢變態出晒名架啦，我未返工已經知，而家都仲有網上Secrets講，真係可以講係遺臭問年呀。公平講句，佢又唔係學期尾先變態。The devil you know．都話老校好睇我，封我做 數學科副主任添，仲一度想我做附加數學科主任，開心過銀河洗碗勳章。
9. 近因，可能講返2004年7月1日，我同我亦師亦友嘅「教務主任」（其實大我幾年啫）齊齊在學校整成績表（亦係此人介紹我去太古城地利亞，促成我人生第一次跳草裙舞成功，世界從此不一樣）。係喎，紅日，但，我生日喎。我生日就在學校整成績表。好似係嗰日，定係再早啲，佢話我知佢唔撈。年少嘅我，就十分戇居，唔知做乜講咗句：咁我都唔撈了。
10. 佢送畀我一個恥笑，我就用埋學校部printer（唔通走去慈雲山廣場？）印埋我封resignation 2004．之後就發生咗電梯辭職。但，我會為個麻甩佬辭職，聽落都唔似真相啦。
11. 然後，女嘛。嗯，尤伯連納話你知，真的，千萬千萬唔好搞同事，一次都唔好。我知道已經太遲。對，後來我都仲有再犯。但，真係千萬唔好搞同事。搵食行遠啲，唔好嗰度食嗰度屙。如果我以前冇搞同事，我好相信而家我根本就唔會响呢度同你地講我生肺癌嘅嘢（？）。
12. 又同大家估嘅唔同，當年嘅我仲係有啲良知，至少表面上係。絶對冇咩metoo乜鬼 ，不過係寫下情信（嘩屌）整下蛋糕（嘩屌屌）彈下琴唱下歌咁（嘩屌屌屌）之嘛。當然就追求不遂，高估自己吸引力。但有乜特別？溝女嘅嘢，一係入一係唔入架啦。但凡你溝唔到女，溝唔到仔，見工唔成，畀人鬧畀人笑，都係高估自己嘅吸引力，閒過立秋啦。
13. 再講得簡單啲，只係我唔撚化，廿六歲人仲懷春少女咁玩單戀，人地根本半秒都冇考慮過，只係面斥不雅，一場同事費事做到咁盡。都係我嘅錯。
14. 固然，搞同事係唔好的，因為搞到日夜對住面阻阻咁。你笑我無聊都好，當年我的確唔想再見到佢（唔係恨，係無地自容，柒咗），應該係我走嘅主因之一。但，都仲係唔make sense。個盲點係，我要逃避佢嘅，我去第間學校教咪得咯。做乜書都唔教？
15. 首先，都有少少係命運嘅安排。電梯辭職後，就係放暑假（所以先有封王嘅附加數學科主任會議）。本人一早拎咗假外遊（你以為教書唔使拎假？後來仲要補課添，我都仲有返去補，辭咗職唔撚使做？辭咗職有冇出糧丫？）。咁所以根本冇搵工。畢竟嗰個年代，我去兩個星期旅行即係消失兩個星期，人地打嚟叫我見工咁點？而且亦都時間緊迫，諗住去完旅行返嚟搵。所以我一份工都冇搵過。
16. 對，蕉行份工，係佢地搵我的。但我乜春新鮮羅白皮人地會無啦啦搵個高校教師（即使只係萬二蚊）？故事係，其實好似聖誕定復活時，我都有寄過下信搵工。真唔記得點解，可能係冇安全感之類，乜都有寄 — 但學校就好少中途請人，所以寄金融工多。
17. 小津安二郎話齋，佢係賣豆腐的，所以佢只做豆腐。我呢？三年大學年半Master，睇小津安二郎就唔少，但拎得出嚟嘅專門技能近乎冇，叫做考過下CFA。所以咪又係見銀行。
18. 而當年我仲有去蕉行見過工，見過後來嘅老細標哥，算係帶我入金融業嘅人（畢竟佢可以拎我份CV去包橙皮），當時當然係衰咗。
19. 就係2004年7月，颱風康柏斯襲港（Google的，但我記得打風），8號風球我上飛機 ，坐長榮經台北經曼谷再飛維也納。東歐之旅。唔止，我去到布拉格去到布達佩斯去到華沙仲要寫明信片。畀邊個？你話呢。寄去邊？寄返學校。咁當然係所撚有人都睇到啦。
19.但講返，在我去機場嘅途中，我就接到標哥嘅電話：
「喂，埃汾下話？支那咩春 Bank 標娘呀」（都退咗休，唔怕開埋姓）
「點呀呢排。仲教緊書？呀？剛辭咗職？咁啱啦。之前你見過刁拿青衣個位，仲有冇興趣？下？去緊機場？唔緊要，咁你返嚟我地碰個面」
然後7月尾定8月頭，我去咗次中環，標哥見面潤多我一句「上次原來冇請到你？咁你都幾渣喎」。就請咗我。
20. 事後知道（其實應該一早估到，但當年我仲係初哥），好簡單，就係當次佢請咗嗰條友，走咗。咁老細都係懶嘅（拿，真係記住呢句），即使唔係自己錢都唔會想登多次ad，因為仲要同啲濕鳩HR接觸，就算只係簡單一句「用返上次個ad」，都意味住再要見過啲人，而好可能係混吉嘅人。
21. 你係老細會點？我係老細而家都係咁：咁不如，搵返上次見過嘅人啦，慳水慳力，搵個second choice 嚟執二攤。搵個唔係十分非常之咁西，又唔貴，又可以即時上任嘅
22. 而嗰個唔係十分非常之咁西，又平，又冇工開嘅人，就係我。
23.係喎，安雅仲未出場，會談亦無未出場。信我，下一篇就會，即係聖誕就會。「如果聖誕冇就扑星day安雅陪你一齊扑」。係喎，我仲係一路寫一路改的。
24. 大家平安夜快樂，但真係，唔好搞同事。Never too late，就算你今晚搞都臨崖勒馬。
25. 當然既然講得安雅會談，我唔教書，其實主因唔係搞同事。咪話咯，我又唔係metoo，唔會畀全行封殺。我想換環境，轉第間學校咪得。我間中學當年好多老師走，我嗰年好似走咗十件—而佢地得中一至三咋喎，即係三十幾件走咗十件！所以我轉校，對家實理解，反正本校嘅作風，在行內都好出名。咁我做乜要減人工做銀行？下篇解。下篇安雅就出場
新讀者，唔知埃汾到底撈乜，唔教書之後又點嘅，可以睇下面嘅附錄。舊讀者就真係唔使花時間了。
Facebook 專頁有更多短文: https://www.facebook.com/ivanliresearch
附錄：
關於埃汾嘅職場生涯，其實都冇乜好寫。但都係好似啲英超球員咁，盃都未撚捧過，廿幾歲已經出自傳，口水多過茶。以下係個叫做簡單嘅時間表，鍾意慢慢睇．全部係medium 文
辭職記四部曲，講咗歷年我咁多次辭職，真係由第一份工講到上一份了。
1. 誤人子弟終不悔 —講教書，然後離開教育界做蕉行
2. 一個黐膠線的少年 —講由蕉行轉去耆英做分析員然後被炒
3. 對家出幾多我出幾多！—講被炒後去到東亞去到台灣佬再去咗星矢圍高達
4. 戀戰中環 — 講我在星矢圍高達半裸辭，之後做咗陣初創同文青嘅生涯
至於關於我而家份工，你估都估到，唔會寫太多。正如上一份工我都唔寫太多，之前年代久遠就可以寫，反正當事人有啲已經退休或上岸，或者同我已經唔會再有咩相逢。
不過關於而家份工，都新鮮寫咗篇。詳細內容欠奉（其實Google 下咪知，證監會持牌人邊有私隱？你幾時畀人炒都人人知），但有講心路歷程。時序當然係四部曲之後，可以當5
5. ［殘年急景］2019年回顧前的回顧，工作篇
講過，耆英係我做得最耐嘅一份工（8年），搵得錢亦最多（總共），喜怒哀樂都有，學嘅嘢最多，影響我最深。再講白啲，我結婚買樓都係在耆英時發生，亦多得佢我先由低級中產（定高級窮人？）變做中級中產。所以當然會寫多啲。
以下呢篇就係寫我入去初期嘅事，點解請咗我，以及亦師亦兄亦父亦友嘅老馮，仲有第一次有人打嚟叫我過檔嘅事。時間上係四部曲嘅2同3之間。
2.1 到呢樣嘢發生在你身上 你職場就略有小成啦
2.2 荷蘭西門吹雪話，著便服，why not?
仲有，在耆英我係被炒嘅，當然係好難忘嘅經歷，亦寫咗多啲。時間上係四部曲嘅2同3之間。
2.4 被炒記：到嗰日你先知被炒，你個人都幾失敗
2.5 Come on James：（人哋）被炒記之德意志銀行大屠殺（上）
2.6 Come on James：（人哋）被炒記之德意志銀行大屠殺（下）
咁，呢篇《安雅會談》，就會係四部曲中，1同2之間嘅事
