暗黑企管:員工,股東,客戶,是但死一瓣
Facebook 專頁有更多短文: https://www.facebook.com/ivanliresearch
Facebook Page 開李嘉誠搵客笨,但對股東對員工好,真係好人一生平安。亦令我呢篇倉底(都係一個月前啫)文出返嚟。照計新鮮過百佳啲過期嘢。
好簡單,就係impossible trinity.之前寫過匯率不可能三角,簡單嘢,但多人睇。
一句講完:穩定匯率(即係非浮動匯率),資金自由進出,同埋獨立貨幣政策,不可能三者並得,只可以揀兩樣(話時話,可唔可以只選一樣?)。
香港行聯匯就要固定匯率同資金自由進出,冇獨立貨幣政策,德國法國用歐元,亦都一樣結果。英國日本韓國就要資金自由進出,又要獨立貨幣政策,咁就冇咗穩定匯率。中國呢,就要獨立貨幣政策,又要穩定匯率,就冇得資金自由進出了。三者只可選二,篇文有解點解,或者自己做思考實驗
今次我想講嘅係,撈steak in society,上市公司嘅三種「持份者」,股東,員工,客戶。理論上應該可以三者兼顧,做大個餅,三者齊贏(但,一時諗唔到邊間,嘻嘻)。例如理想中嘅資本主義,Corporate World,America Inc as a whole 。(當然何謂極端有啲滑頭,難定義)
另一極端當然係 攬炒,極左極右,無政府法西斯共產,三輸
但實際上呢,更多情況就係 quasi zero sum game。三者不能兼得。拉一個打一個。 Pareto optimality咗,你去到某個位,要幫其中一個,就要傷害另外兩個。實務上就係傷害一個益兩個。
而企啱位就好重要啦!
搵客笨,股東同員工肥:例如長實,明顯地,就係搵顧客笨(鑽石廳,油魚,豐澤買嘢,大家都明)。但對股東同對員工都好,未必係百佳阿姐(但聞說都不太差?),而係坐冷氣房啲友。
投資銀行,高盛摩根士丹利某程度上都係呢種,但再極端啲,最肥嘅只係員工。股東,還可以。2007年前還不錯,只要唔係雷曼或美林股東。客就必然被搵笨實。而家可能Facebook 都係呢種模式,股東回報好好,員工又係肥仔。客?冇噃,多謝你成就佢發達(但你有得上網刷存在感又算唔算拎到回報?)
(By the way,雷曼個CEO,爆煲前一樣成副身家九成係雷曼股票,出糧都係絶大部份係雷曼股票,絶對有alignment of interest.唔係話叫你母語教學但送個仔去外國咁。但雷曼一樣爆煲,呢排興講Skin in the game,可以諗下。即係你老婆都有份食餐飯,doesn’t stop her from 煮到好難食)
有冇搵員工笨,顧客同股東受惠嘅呢?其實好多,甚至大多數企業都係。呢種模式應該最常見。例如麥當勞,或者你買嘅Nike波鞋,最好唔好諗係咩人整的。君子嘅嘢食飯就食飯,唔使坐Chef table。亞馬遜亦係一個例子,抵光頭佬做首富,而啲執倉員工慘過西,尿都冇得屙。
最違反常識嘅:有冇係搵股東笨,但最後客同員工受惠?梗係有!而家啲咩科創公司好多就係咁。股東夠傻畀錢人燒,公司就益客益員工。UBER咪係 — 你得益(明顯地啦),又平啲又唔使對住啲粗口的士佬有個礦泉水林保怡。員工一樣得益。你話,喂,聽講渣UBER窮過做麥當勞。是真的,不過型嘛。但,邊個話你知渣UBER嗰啲係「員工」?坐冷氣房啲啲先係嘛。
N咁多啲外賣公司都係咁,燒錢燒到癲,客就有超好服務,員工又得益,可憐出錢畀人燒嗰個。「啲南亞仔人工好奀咋喎」。撈撈撈,嗰啲唔係「員工」。員工有好多種;有啲坐冷氣房唔使送chicken tikka masala嘅。就算送都叫media startup beat採訪講一大輪心路歷程咁,或者要打卡上instagram
結論?就梗係,做人,要企啱位。做高盛嘅員工,長實股東,UBER嘅客。好人一世平安。
掉轉?做亞馬遜嘅員工,長實嘅客,外賣仔嘅股東,永不超生
同埋:幾時都記得要坐冷氣房