［平成離合戰］平成年代股市就係悠長假期，但焉知非福

Facebook 專頁有更多短文: https://www.facebook.com/ivanliresearch

今日係愚人節，日本就宣佈新年號，夠晒有幽默感。你見Facebook全部都係講呢樣嘢，呢啲就係「鄉下」，我肯定之後過廿三條都冇咁多人講，放長雙眼睇啦各位，埃汾係冇呃你哋㗎，try me。所以我肯定香港人唔係要自主，聽日公投加入日本國一定大比數通過。

不過唔講政治（講少少啦下），講股市。原本想比較下日本不同天皇年代嘅股市表現，後來諗下都多餘。倒唔係明治年代冇股市，但同現代嘅定義都仲有啲距離，亦都冇指數，會變咗玩考古，好難討論。大正嘉仁十幾年就香埋，更加不用講。所以唯一要討論嘅，只係昭和裕仁同埋平成明仁兩任。平成仲未完，但冇關係，幫佢埋定單都得，我就唔信四月跌到四位數。

都唔使咩日本通都知，昭和年代，多可喜多可悲，而不幸（定有幸？）昭和天王裕仁相當長命（走甩咗冇變戰犯上斷頭台），又不幸（定有幸？）大正嘉仁好早死，五十未夠就釘蓋，所以昭和裕仁在位超過60年。昭和時期日本由新興勢力變到一線政經大國，但發動二戰係在昭和，食原子彈亦都係在昭和，戰後經濟再起飛文化征服全球亦係昭和。

打後嘅平成年代就好大對比了，就係水波不興，「悠長假期」。對，「悠長假期」就係一套好「平成」嘅劇。泡沫經濟爆破正係平成一開始嘅事，打後通縮，迷失十年變迷失廿年再變迷失三十年。政經上中國堀起，都算，你話晒13億人一人一篤屎都日本沉沒。連明顯之前睇唔起嘅韓仔都在經濟（是真的）文化上追上嚟先難忍嘛。

股市又點？其實都大約估到，同上面嘅主旋律一樣。

昭和年代1926年開始，日經平均指數（下稱日經，如果係越南就越經平均指數了，講笑的，其實叫胡志明指數，不過西班牙就真係馬經平均指數）1971年發表，但條數計到去1949年。再早就搵唔到更好嘅資料。

由1949年至到昭王裕仁1989年1月釘蓋，剛好40年。日經指數？由176點升到30000點，170倍，未計派息之類，更唔好講其實昭和第一年就跌到100點左右（倒係裕仁拉柴之後嗰日，日經係大升的，不過佢係星期六過世的），你用年底做起點仲勁。我知40年好長，但開返40次方，都講緊一年14%，其實古今中外都少見，真係經濟奇蹟。當然亦都因為1949年係戰後，如果你個基數係1939年我估又好唔同啦。

平成呢？都有名你講，迷失30年。平成即位時嘅1989年1月，日經指數係30000點，而家？22000左右．固然係因為平成即位後不久就經濟泡沫爆破，而家由低位都升返近200% （日經一度跌到近七千點，四位數！），好過冇。

但重點係：基本上你點買，都係輸錢多。由平成第一年開始你月供日經 ETF，平均成本供足30年，都仲係要輸錢！甚至你計埋股息再投資，都一樣輸錢。

當然仲有一個因素係：日圓。太早嘅數字又係唔講，日圓在昭和戰後直到1970年代，基本上係緊盯美金，1對360。70年代開始升升升，最後昭和終結時升到近1對100，平時升多一浸就爆煲。可想而知如果外國人買咗日本股票幾咁富貴，又或者日本人沽晒啲股票轉做美金可以買幾多嘢。

去到平成，就不用多講，最留意圓匯嘅係香港人，其次係大陸人。同昭和年代瘋狂升值比，日圓匯率其實都係冇乜點上落，係你啲香港人先日日返工望住六算七算點撚算。

好啦，只係講咗（部份）昭和年代日經升170倍，平成年代點買都輸錢。但，大環境呢？唔同其他人比講乜都假，咁不如又睇埋香港（中國股市歷史太短，不用討論，美國夠長，但我懶，你鍾意你搵埋佢）

冋日經相比，恒指歷史更加短。1964年先有（日經係1949）。1964年至到昭和終結嘅1989年1月，恒指由100點升到上2800點左右，28倍。同期嘅日經，都1200點升到30000點，25倍 — 其實恒指表現係差不多嘅。當然你可以講日本係大國，香港係彈丸之地。

平成年代又如何？當然全球增長都慢咗，特別係近十幾廿年。但，頭先講過平成年代日經由30000跌到22000。恒指呢？2800點升到而家剛好近30000，10倍。呢度就放到甩晒了。

不過想講嘅係，如果你唔買股票（但，你啲強積金呢？拎去買bitcoin?），以上嘅好似唔關你事。但日經在昭和同平成年代真係好大反差，反而恒指呢？都係升，升20倍同10倍嘅分別。所以都係嗰句，香港地呢，冇資產你就仆得街了。

咁總有人唔服氣，話應該用97年計（明明日本先係鄉下）。好，又試下，97年前固然係好，不用討論。但97年後呢？我計97年高位都16000點，而家就近30000，你計埋股息都一個double。唔敢話好好但一定好過日本股市。

不過另外仲有一個講法，所謂咩迷失廿年三十年，純粹係日本用嚟忽悠大家嘅東西。事實你見日本人係咪水深火熱呢？又好似唔係。冇人工加？係，但通縮喎。係咪窮到仆街？同香港人比可能係，但同其他人比絶對仲係好富貴。東京依然係亞洲最多頂級（即係，貴）餐廳嘅亞洲城市，不見得全部係遊客—仲有好多當地廢老同妹妹仔去的。係冇得炒樓炒股炒埃瘋咁開心架啦，亦都冇得一年去幾次旅行（國內都仲得……啩？），亦都冇得上流。不過呢，其實如果係普通人（唔好計富豪），人地啲生活都仲係好過你。至少你一放假要去日本，人地唔使一放假走人（亦都冇錢）。所以識玩梗係買香港資產然後去日本洗錢。正如以前就香港搵錢深圳消費。香港嘅核心價值幾時都係自己高人工然後輸出劣質遊客。

至於令和嘛，咪玩啦，水晶球咩。股市要好過平成應該唔難，但要同昭和比，甚至同香港比，都應該係難啲。首先個世界已經唔同咗，低增長先係常態。另外，對日本仲有一樣好不利嘅嘢，就係人口下降。當然最後都係會或多或少咁收啲新移民，但一個周圍都係香港人嘅日本仲係咪日本？

呀仲有一個好大嘅問題，兩韓統一。亞皆老街已經太多人，加多個統一的韓國真係唔掂。當然如果係日本吞併咗北韓又唔同講法啦下，不過諗下好。或者嚟個南北韓日本共榮圈，韓國啲女，加埋日本啲.....都係女，不得了。

Facebook 專頁有更多短文: https://www.facebook.com/ivanliresearch