出書背後的故事
點解我要出呢本書？
點解你要買呢本書？本書講乜？
有關馬蘭頭獎學金
點買書？
1. 呢篇不設語音版影像版啦，冇必要。
2. 實在唔好意思，在Facebook Page 講咗，呢度都未講。但都正式講一次，Ivan要出書了。之前話忙到九彩，就係搞呢本嘢。7萬字，全部由零開始寫，128蚊。寫550字先值1蚊，陰功。仲有你可以估下128蚊我分到幾錢。
出書背後的故事
3. 出書背後嘅故事，畀你地Patreon讀者先聽為快，出面未講過。
4. 一路都有人搵我出書，有時係啲細節傾唔埋，例如指定我寫乜，或者話我提議嘅主題唔吸引，又或者唔畀寫口語。亦好多時因為我唔會的起心肝寫，舊年去台灣，加埋返香港，隔離28日，話會寫書，一隻字都冇寫到。
5. 至於自資？我係拒絶的，唔係畀唔起幾皮嘢，而係自資畀人感覺差：你梗係冇人肯幫你出書，先要自high。
6. 但有時啲嘢就係咁，The Best Plan is no Plan．唔係所有人都係咁，但我可能係，至少我出書係。靠嘅唔係點計劃，點大綱，點試寫一個Chapter—而係一股狠勁：刁那媽頂硬上一take過搞掂佢。我大學做功課寫論文都係咁，返工寫報告都係咁，年青讀者唔好學。
7. 我知好多人未必好鍾意HomeBlogger諗Sir，但冇佢冇呢本書。就係5月尾有一次同佢傾起，佢問我係咪想出書。佢完全畀晒自由度我，只係我地傾咗一次寫乜，然後就拍板一二三去馬。就係因為我同佢直接傾，唔係好似啲門高狗大傳統出版社咁搞一大輪，先火速搞掂本書。
點解我要出呢本書？
8. 但仲有個小問題：有冇諗過我出書為乜？對我講，絶對唔係為錢，一本書128蚊，一版印2000本，買晒已經幾難得。你話26萬？但你可以問下人，作者一般會收幾多%？絶對唔化算
9. 唔為錢，為乜？七成係為圓夢，achievement，即係自high。三成為傳承，之後解。咁為咗自high，當然係要搞個合照簽名會之類。就只係為咗呢啲虛榮。
10. 咁問題嚟啦，傾嗰時都5月尾，仲要趕書展。你想像到，本書我係極速寫起嘅。我14日寫咗7萬字，有幾日仲要冇寫，即係一日寫1萬字左右，你可以試下。留意我居然都仲係照寫Patreon同Facebook Page的
11. 留意啲文，係我全新由零開始寫的。固然你睇目錄發現有啲嘢會熟口熟面（不止賺也不止蝕），但，全部我都係由頭寫起，絶對冇copy and paste一隻字。
點解你要買呢本書？本書講乜？
主要就係支持我，但當然亦都會幫到你。本書講乜？睇目錄已經知，分為三部份。
12. 第一章我的求生指南，講我自己42年嘅故事。你心諗關我春事？我嚟搵發達秘笈的。咁你可以撕走佢唔睇（記得中學時啲女同學都會將本數學書咁拆咗好多份帶返學），不過冇得按比例回水。但，投資就係你性格嘅延續，你嘅職場生涯亦都睇你性格多過實力（由我去講，夠說服力啦）。咁你唔知我經歷過乜，就未必會明我嘅價值觀了。入面亦有講我當年點解揀讀精算，點解去咗英國，點解返嚟教書，點樣入咗銀行，點樣上位，點樣畀人炒之類。
13. 第二章職場求生指南，講我打工嘅故事，包埋我自己「創業」做Content Creator．好多人都係想跳去第三章，但，你冇錢，投乜資？而除非你有父幹或畀人包，否則你嘅錢，咪就係打工返嚟。教你點升職加人工，點跳草裙舞，點揀好老細，求職擇業，做邊行好之類。睇完後，應該對你升職加人工有啲幫助。
14. 第三章，股市求生術。可能好多人直接跳去呢部份。你見部份嘢可能我Patreon講過，但會畀個全新角度你。仲有，入面我寫咗個「阿煩的故事」，全天侯投資法，盡量 one size fit all，fit唔到all都盡量多人，畀咗個理財投資方法你。
15. 冧把？冇乜講喎，平時Patreon仲睇唔夠？
有關馬蘭頭獎學金
16. 而呢本書嘅作者收益，全數會撥歸「馬蘭頭獎學金」（搞緊），幫我中學嘅師弟師妹，窮得嚟而又繼承到我思想嘅。
17. 點解有咁嘅念頭？冇公開講過。再早少少，我同啲中學同學已經講過類似idea，但你知呢啲嘢，人多未必好事，講講下就十個救火的少年，又有啲口爽荷包立，又或者你想畀個窮學生，我想只睇成績。又或者有啲覺得自己錢又出咗又冇份評審。總之，你估到了，以我性格當然就係自己搞算數，自己話晒事。
18. 至於真係扑槌，係舊年12月在台灣隔離時，當其時睇緊誠品書店創辦人吳清友嘅書。我就冇佢咁富貴，但都想「做啲嘢」。咁啱嗰時Patreon開始起飛，我有啲閒錢，就發財立品，自我感覺良好，貢獻下咁，等我末日審判時都有啲嘢寫。但之後大家知道，我畀人炒咗，咁所以都放埋一邊幾個月，到而家再鬆動返啲先再諗。
19. 因乜揀我中學嘅師弟師妹？並唔係我對我中學特別有感情（都有啲，但唔係好多）。而係，我都諗唔到更好嘅對象。唔通畀港大？唔使啦。
20. 況且，客觀地，而家社會流動性低咗好多，一個叻但窮嘅學生，真係唔似以前咁易上到位。我希望就係幫到啲窮但叻嘅學生，等佢地大學時，唔使因為冇錢而要花好多時間搵錢。我一生中冇乜好多後悔嘅事，但其中一樣就係覺得當年唔應該花咁多時間去幫人補習 — 你搵嘅只係細錢，但原本啲時間可以做其他嘢。睇下書，睇下戲，去下旅行都好。
21. 當然，亦同我冇小朋友又唔打算生有關。我呢幾年，開始諗下傳承。傳統上最簡單就係你個仔，如果收徒弟嘅就係徒弟。但我呢？除咗呢本書，就真係要搵個人繼承我嘅思想。所以最後我希望會係學校推薦幾件窮而又叻叻地嘅學生畀我，我逐個傾，可能食餐飯，睇下邊個最啱嘴型。我亦希望可以之後每年同佢地食一次飯咁，「馬蘭頭學人」。
22. 當我每年揀一個學生，一年就4萬蚊，四年就16萬（仆街三改四害人不淺呀）。咁即係我一年要拎16萬出嚟，所以你計到，賣書嘅錢真係微不足道。
23. 一年16萬話多唔多話少唔少咁咯，一個月萬三蚊，我希望第時在Patreon都搞捐款，保證全數去呢個獎學金。因為你地人多，例如當一人一半，你地6500我又6500，呢度1800人，咁你地每人每個月都只係畀多4蚊港紙咁大把。但當然，你會覺得，我啲師弟師妹關你乜事，我發財立品關你乜事，就係4蚊都唔會畀。但我都會照樣試下。
點買書？
24. 星期日7月18日夜晚會有個好快嘅新書發佈會，應該可以影相簽名之類，但只得45分鐘。問題係，簽名嗰樹買唔到書，書展入面我估都買唔到。即係你要預先買定。
25. 搞到咁趕，當然係我嘅問題。都話5月尾先開始寫，完成到已經係奇蹟。
26. 點買書？4個方法
27. 你可以去Homeblogger個網，畀完錢，然後上去尖沙咀拎。又或者加多廿蚊，順豐送埋畀你。已經有唔少人訂咗，不過送唔送得切，我都有啲疑問。
28. 唔趕書展見面影相簽名嘅，仲簡單，遲下書局會有得賣
29. 至於海外讀者嘅，Homeblogger應該唔會寄（我試下叫佢哋研究），最簡單就係你搵我買，我寄畀你（但郵費當然你畀，至於點畀我都唔知，最好有香港銀行戶口），不過我分分鐘搞幾個月先會寄。
30. 最後嘅？所有20/40蚊年費會員（記住係年費！），都會送一本畀你。點送我未知，但我估最好係你自己買完，然後PM我，我過數畀你，大家最方便，講個信字。
31. 當然，你之前未係20/40年費，而家先去轉20/40年費都得的，仲有聲音版錄像版送埋，最好人人轉晒20/40年費我本書就賣斷市（初版2000本咋）。照舊年費係有85折的。
32. 而家畀你地先睹為快，過兩日我就將呢篇文share出Facebook Page，應該畀更多人睇到。
33. 預先多謝大家支持！
